1962 – 2022
Il y a 60 ans, Henri Mouly, Majoral du Félibrige, avait soutenu les mineurs de Decazeville lors de la Grande Grève. Nous souhaitons dédier son poème aux ouvriers de la SAM.
Nos laissarem pas tòrse
Sèm los enfants de Cransac, de La Sala,
Firmi, Penchòt, Aubin, Combas, Viviez ;
Sèm lo minur que jost tèrra davala,
D’aquel país nautres sèm los obrièrs.
Cadun l’aiman nòstre vièlh País-Negre,
L’avèm cantat e mai lo cantarem !
Contra Paris, nautres los morre-negres,
Nòstre Bassin (bis) totes lo defendrem.
Repic
Ò lenga del trabalh, lenga de nòstra tèrra,
Als òrdres de Paris, quora auràs escapat ?
Seràs nòstre drapèu, lenga de la misèra,
Lenga de frairetat,
De Libertat.
Dels païsans, que subre las aradas
Fasián venir lo pan cada jorn,
Vesèm aduèi tant de pòrtas barradas,
Tantes d’enfants quitan lo terrador,
Que demandam a nòstres governaires
Se son calucs de nos deraiçar aital
De nòstre ostal, d’aquel parlar tindaïre
Que regaudis (bis) nòstre còr mièjornal.
De grands mossurs que l’argent desturbèla,
Venduts que son totes als financièrs,
Nos son tombats dessús coma la grèla
Quand ven roïnar de países entièrs …
Mas duèi n’i a pron ! Revelhatz-vos, ò fraires !
Totes units, obrièrs e païsans,
Saurem gardar contra los afamaires
Nòstra fièrtat (bis) d’òmes leials e francs.
Demandam pas de castèls, ni de rentas,
Ni de favors ; z’o laissam als fenhants !
Mas demandam, sens vergonja ni crenta,
De poder viure en patz en trabalhant.
Demandam res que nos apartenga :
Lo drech al pan e lo drech al trabalh.
Totes en còr, cantem en nòstra lenga:
Viva l’obrièr! (bis) a l’ifèrn los paucvals !
Enric MOULY, 1962
Poèma tirat del Fonds Vaylet
(Associacion « Les Amis de Joseph Vaylet-Occitans en Roergue-Naut », Espalion)