« Quand l’endacòm mai es aici »

Musèu de Roergue- Espaliu :  Exposicion temporària del 14 de junh de 2022 a octobre de 2023

« Quand l’ailleurs est ici », « Quand l’endacòm mai es aici »

Aquela exposicion, evolutiva, que las recèrcas son luènh d’èsser acabadas, es un convit al viatge dins de continents vièlhs o novèls, amb la colleccion remirabla recampada pel Majoral Josèp Vaylet, collector e poèta d’Òc, dubèrt a l’universalitat del monde.
Pr’aquò, Josèp Vaylet a gaire viajat fòra França si que non en Euròpa fins a Espanha e Jerusalem.
« Aparaire de la tèrra roergassa e de sa lenga » coma es escrich sus son estatua al Fièiral d’Espaliu, sul Camin de Sant Jaumes de Compostèla, a causit de demorar dins son país naissedor.
Es, encara , en 2022, «  lo Barde e l’Arremosaïre de la Valòia d’Òlt e de las Calms d’Aubrac » ( Grelh Roergàs).
Es  aital que d’Espaliu, correspondèt amb los Felibres dels países d’Òc, amb de poètas, d’emigrats aveironeses tals que missionaris, militars o tota mena de viatjaires.
Tot aquel monde gardan lo ligam amb lo país quitat e fisan a Vaylet belcòp d’objèctes per son Musèu.
Sabon que la tòca de Vaylet, dempuèi sa demòbilizacion en agost de 1919, es de collectar los testimònis de l’istòria pichona o granda de Roergue e de son sègle, en mai de los de la cultura e de la lenga d’Òc que s’avalisson après lo tèrratremol de la Granda Guèrra.
Aquela segonda exposicion, après la de l’estiu de 2019 : « Joseph Vaylet, Majoral du Félibrige et poète collectionneur », atèsta de l’excepcionala dubèrtura d’esperit del  Felibre Majoral  espalivés tot en obrant, sens relambi, a la valorizacion e a la transmission de la cultura d’Òc.
La còla dels Musèus del  Departament d’Avairon e las doas associacions « Musée d’Art et Traditions Populaires Joseph Vaylet- Musée du Scaphandre »  e  « Les Amis de Joseph Vaylet-Occitans en Roergue-Naut », trabalhan amassa per metre al punt aquela exposicion que va demorar en plaça fins a octobre de 2023.
Va evoluir al fial de las recèrcas de l’equipa departamentala e de las dels benevòls de las doas associacions Vaylet.
Los «  Amics de Josèp Vaylet », ja, dempuèi  lo mes de junh de 2022, an trobats maites documents, nòtas e inedits dins lo Fonds e la Bibliotèca de  Vaylet.
E se pensan que fins a octobre de 2023 e… al delai, ne trobaràn encara maites que los pivelaràn !…

Eliane Moisset, Mèstra d’Òbra.
Capiscòla de l’Escòla felibrenca « Les Amis de Joseph Vaylet-Occitans en Roergue-Naut »