Cap de l’An

Per la despartida del Majoral Zefir Bòsc, lo 25 de novembre de 2020, la presencia, dins la glèisa d’Espeirac, èra limitada a 30 personas : se poguèt pas far l’omenatge que se meritava.

Aquel omenatge es estat fach aqueste 27 de novembre de 2021, aprestat per la familha de Zefir en acòrdi amb los Felibres de Roergue e de la Mantenança Gasconha- Naut Lengadoc.
Dins lo còr de la glèisa, prenguèron plaça, amb lors bandièiras, las associacions que ne foguèt lo sòci : Lou Felibrige, Lo Grelh Roergàs, « Les Amis de Joseph Vaylet, Occitans en Roergue Naut», «L’Escloupèto de Rodez», «La Cabrette du Haut Rouergue» d’Espalion, «Lous Castellous de Sénergues.
Lo Majoral e Prèire J.Passerat oficièt. Son presic insistèt sul costat « grand poèta d’Òc » de  Zefir Bòsc amb una causida de vèrses primats als Jòcs Florals de Tolosa.
François Bòsc joguèt un regret a la cabreta, s’ausiguèt la votz de Philippe Vialard interpretant lo poèma remirable de Zefir, « Tèrra d’Aubrac », «Lous Castellous»  an cantat la cançon que Zefir lor aviá compausada.
Après la messa, siaguèt lo moment dels omenatges: Cònsol d’Espeirac, Albert Bibal pel Grelh Roergàs, los sòcis dels « Amis de Joseph Vaylet-Occitans en Roergue-Naut », de Evelyne Auban, Sendic de la Mantenança de Gasconha Naut-Lengadoc e, per acabar, l’omenatge del Sénher Capoulié Jacques Mouttet.
Al cementèri, lo Capoulié e los enfants de Zefir, depausèron una garba a las colors d’Occitània.
A la sala de las fèstas d’Espeirac, la familha, los amics e los felibres s’acampèron per un repaís roergàs e frairenal.
Foguèt legit un omenatge pel CCOR de Rodés, de son amic Paul Bony.
Après lo repaís, los cantaires dels »Amis de Joseph Vaylet » intrepretèron quatre cants sus de tèxtes de Zefir Bòsc.
Maites cants roergasses seguèron e lo Coupo Santo clavèt aquel jorn del sovenir.

Un » Cap de l’An » plen de fervor e de frairetat mas simple, a l’imatge de çò qu’èra nòstre Felibre Majoral Zefir Bòsc.
Grand mercé a sos enfants e a tota sa familha de nos aver associats, amics e felibres, a’n aquel omenatge !

Gérard Ferrand e Éliane Moisset
Associacion « Les Amis de Joseph Vaylet- Occitans en Roergue-Naut »