L’un des sept contes de Noël de Joseph Vaylet

                 Ci-dessous :

Conte de Nadal tirat de « Racontes del Païs Ribieiròl » Zefir Bòsc

Hommage d’Eliane Moisset, Présidente de l’Association « Les Amis de Joseph Vaylet » aux obsèques de Zefir Bòsc

Uèi, amb los sòcis de l’Associacion dels « Amics de Josèp Vaylet », soi dins la pena.
Zefir Bòsc, nòstre Vice-President e mon pairin en Felibrige, nos a quitats.
Zefir Bòsc daissa una òbra immensa de poèta, cercaire e grand aparaire de la lenga nòstra.

Lo Majoral Vaylet fa melhor que ieu lo laus de vòstra vida vodada tota a la cultura e a la lenga d’Òc, dins de manuscrits trobats dins lo Fonds Vaylet :

A mon car amic Zefir Bòsc per la remesa de sa cigala d’argent :
De Truièira a z’Aubrac, s’ausis una Cigala
Que canta son País, sas bèltats, jorn e nuèch
D’Entraigas a Rodés part d’un lèste còp d’ala
E son cant s’espandis de la Valòia al puèch.

 D’un chèstre a l’altre musiqueja
Coma una orguena en tèrra d’Òlt,
Per sason calda o sason freja,
Acompanha lo rossinhòl. […]

Per mon gente Amic e confraire Lo Majoral Zefir Bòsc per la remesa de sa Cigala d’aur :
A bufat sus nòstre Roergue
Aquel ventolet qu’apelam Zefir
Per nos menar un nòvel clèrgue
Que met lo país en exèrgue
Es tu, Majoral Bòsc Zefir !
Òc, cinq Majorals roergasses
Que pòrtan la Cigala d’aur …

Aidà, sèm cinq coma de fraires
Parièrs als cinq dets de la man
Units e valhents trabalhaires
Que fan de vertadièrs trobaires
Nascuts al país occitan.

Ara, car Zefir, nos passatz lo flambèl. Anam ensajar de sègre lo camin ont nos avètz endralhats.
E, per claure, fasèm nòstra, vòstra pregaria (*) :

Dius Nòstre Paire …
Qu’un pòble franc
Aja l’alanç
Amai lo vanc
De s’acordar
Totjorn en patz,
Dins l’amistat.

 Que plan se tenga
La nòstra lenga :
Lenga d’amor
Dels trobadors
Que te cantèron,
Te serviguèron,
Coma faguèron :
Amb lors cançons !

(*) : Pregaria extrachada de « Darrièrs ramèls » – Zefir Bòsc – 2016